Кралицата на поп-музиката, Мадона, повторно го привлече вниманието на јавноста со искрено и духовито признание за својот љубовен живот. Иако со децении е една од најголемите музички ѕвезди во светот, нејзините врски и приватниот живот отсекогаш биле тема што предизвикува огромен интерес кај фановите и медиумите.
Во неодамнешно гостување во емисијата „Rent Free“, 67-годишната пејачка откри дека во младоста имала необичен критериум при изборот на потенцијални партнери. Наместо да обрнува внимание на статусот, изгледот или богатството, Мадона најпрво се интересирала дали момчето има добра бања.
„Излегував со момчиња во зависност од тоа дали имаат када и туш што можам да ги користам. Ги прашував каде живеат, а потоа веднаш следеше прашањето: ‘Дали имаш када?’ Тоа беше голем плус за мене“, раскажала пејачката низ смеа.
Таа објаснила дека во текот на 1980-тите години, кога била дел од динамичната њујоршка клупска сцена и сè уште го градела својот пат кон светската слава, често користела вакви практични „критериуми“ при запознавање нови луѓе.
Но, како што признава, бањата не била единствената причина поради која прифаќала покана за дружење.
„Ќе отидев кај момчето или потенцијалното момче, ќе се истуширав или ќе се искапев, а потоа ќе ја јадев храната што ја подготвила неговата мајка“, открила Мадона, предизвикувајќи смеа кај публиката.
Бурен љубовен живот исполнет со познати имиња
Во текот на својата повеќедецениска кариера, Мадона беше поврзувана со бројни познати личности од светот на музиката, филмот и спортот. На нејзината листа поранешни партнери се наоѓаат легендарниот рапер Тупак Шакур, актерот Ворен Бити, бејзбол ѕвездата Алекс Родригез, како и нејзините поранешни сопрузи Шон Пен и Гај Ричи.
Неодамна таа повторно привлече внимание кога откри дека Џон Кенеди Помладиот, синот на поранешниот американски претседател Џон Ф. Кенеди, бил еден од најдобрите љубовници во нејзиниот живот.
Во врска со партнер 38 години помлад
Денес, Мадона е во врска со Акем Морис, кој е 38 години помлад од неа. Иако нивната врска често предизвикува коментари во јавноста, пејачката не крие дека е среќна и исполнета.
Парот генерално го држи својот приватен живот далеку од медиумите, но повремено споделува заеднички моменти на социјалните мрежи.
Мајка на шест деца
Освен успешната музичка кариера, Мадона е и посветена мајка. Таа ја има ќерката Лурдес Леон со фитнес тренерот Карлос Леон, како и синот Роко Ричи од бракот со британскиот режисер Гај Ричи.
Покрај нив, таа посвои уште четири деца од Малави – Дејвид Банда, Мерси Џејмс и близначките Стела и Естера.
Иако денес е една од најуспешните и најбогати музички ѕвезди на сите времиња, Мадона со своите анегдоти од младоста покажува дека не заборава од каде започнала и дека сè уште знае да ја насмее јавноста со својата искреност и препознатлива смисла за хумор.
