Младиот македонски саксофонист, кларинетист и композитор Христијан Ристески ја објави композицијата „High Away“, трет и последен сингл со кој го најавува својот дебитантски албум „Waters Dance“.
Новата композиција од денес е достапна на поголемите стриминг-платформи, а нејзиното објавување го заокружува постепеното претставување на материјалот пред премиерата на целиот албум, закажана за 2 октомври 2026 година.
„High Away“ е џез-композиција во која повторно до израз доаѓа препознатливиот авторски пристап на Ристески, изграден врз современиот европски џез и импровизацијата. Внимателно обликуваните музички структури се преплетуваат со простор за слободна интерпретација, додека македонското музичко наследство останува природен дел од неговиот личен израз.
Во снимањето на композицијата, покрај Ристески, учествуваат Marko Churnchetz на пијано, Chris Smith на тапани и Hrvoje Kralj на контрабас. Станува збор за музичари со кои тој веќе соработува во рамките на својот квартет, а нивната заедничка работа ја создава пошироката музичка приказна на „Waters Dance“.
Авторска кариера изградена во Грац
Ристески ја развива својата професионална кариера во Грац, Австрија, еден од позначајните европски центри за џез-образование и современа музика. Меѓународната средина во која живее и работи му овозможува да соработува со музичари од различни земји и активно да учествува на европската џез-сцена.
Неговиот досегашен развој е проследен и со значајни признанија. Во април 2026 година, на фестивалот Jazz Factory во Битола, ја доби наградата „Гоце Димитровски“ за најдобар млад џез-уметник во Македонија за 2025 година.
Признанието претставува дополнителна потврда за неговата активност, авторска работа и присуство на македонската и меѓународната музичка сцена.
„Waters Dance“ пристигнува на 2 октомври
„Waters Dance“ е дебитантски албум преку кој Ристески го претставува својот авторски свет, поврзувајќи ги современиот џез, импровизацијата, македонското музичко наследство и личните искуства.
По објавувањето на трите синглови, публиката ќе може да го слушне проектот во неговата целосна форма на 2 октомври.
Албумот ќе биде достапен во дигитален формат и на CD, како и на 180-грамска темносина винилна плоча. Преднарачката за винилното издание веќе е достапна преку официјалната интернет-страница на Христијан Ристески.
Новиот сингл „High Away“ веќе може да се слушне на дигиталните музички платформи.
