Гласот на Доли Партон повторно допре до публиката со објавувањето на „Torn“, дуетот што кантри легендата го сними со Боно од ирската група Ју Ту. Песната е дел од новиот албум на бендот, „Carnaval De Luz“, а според музичарите, тоа е последната вокална снимка што Партон ја направила пред нејзината смрт.
Доли го снимила својот дел во Нешвил во јуни годинава, помалку од три месеци пред да почине на 25 август, на 80-годишна возраст. Песната беше објавена на 13 ноември, заедно со новиот албум на Ју Ту.
„Torn“ е завршната песна на албумот и носи кантри звук, со кој Партон со децении беше препознатлива. Покрај неа и членовите на Ју Ту, како коавтор е потпишан и Џони Мекдејд од групата „Сноу патрол“.
Песната зборува за нарушени семејни односи. Според австралискиот јавен сервис Еј-би-си, првичната идеја на Партон била приказна за жена која се обидува да избере меѓу двајца мажи, а подоцна текстот бил преработен во песна за семејство поделено поради политички разлики.
Боно во интервју за Би-би-си откри дека знаеле оти пејачката е болна, но не и дека станува збор за нејзината последна вокална снимка.
„Тоа беше вистински шок. Шок за нас бидејќи работевме со неа, но и за секој што ја сака музиката“, рече пејачот.
Пораката што Доли му ја испратила на Боно
Пред да биде завршена песната, Партон му испратила порака на Боно во која му пишала дека се надева оти ќе му се допаднат промените што ги направила.
Таа му порачала да го искористи она што му е потребно и додала дека ја сака песната и верува дека од неа може да произлезе нешто посебно.
Соработката започнала откако Боно ѝ подарил гајди за роденден, а Партон се согласила да ги преслуша неговите демо-снимки. Потоа му ја предложила идејата за „Torn“, која музичарите заеднички ја доработиле.
Покрај верзијата на албумот, објавена е и верзија продуцирана од Кент Велс, долгогодишен соработник на Партон, со понагласен кантри звук.
Нов албум по девет години
„Carnaval De Luz“ е 16. студиски албум на Ју Ту и прв албум со нов материјал на групата по девет години. Содржи 12 песни, меѓу кои и претходно објавените „Street of Dreams“, „Silencio“ и „The Greatest Show on Earth“.
Албумот пристигнува во годината кога бендот одбележува пет децении од своето формирање. Во 1976 година, тапанарот Лери Мален Џуниор поставил оглас на училишна табла во Даблин, барајќи музичари за нова група. Од таа средба започнала приказната на Ју Ту.
Бендот ја најави и светската турнеја „The Greatest Show on Earth“, која треба да започне на 23 февруари 2027 година во Мексико Сити.
