Филмот „Непознатата жена“ (Woman Unknown) на данско-египетската режисерка Меј Ел-Тухи ја освои главната награда „Златен лав“ на 83. Филмски фестивал во Венеција, додека Џон Малкович беше прогласен за најдобар актер за улогата во Wild Horse Nine.
Психолошкиот трилер на Ел-Тухи, еден од само двата филма режирани од жени во годинешната главна конкуренција, е сместен во Данска во летото 1945 година, непосредно по завршувањето на Втората светска војна.
Во главната улога настапува Матилде Арсел, која ја игра Мари – дадилка и куќна помошничка што се подготвува да стапи во брак со својот богат и постар работодавач, кој е вдовец. Додека земјата го слави ослободувањето, жените што одржувале блиски односи со германските војници се пронаоѓаат и јавно се понижуваат, а минатото на Мари се заканува да ја стигне.
„Филмот ја раскажува приказната за невидливите жени – жените кои остануваат незабележани и неслушнати. Им благодарам на прекрасните членови на актерската екипа за страста што ја вложија во портретирањето на овие ликови“, изјави Ел-Тухи при примањето на наградата.
Матилде Арсел претходно истата вечер го освои „Купот Волпи“ за најдобра актерка. Во емотивниот говор, проследен со солзи, таа ѝ се заблагодари на режисерката што истрајала во реализацијата на предизвикувачкиот проект.
На годинешното жири претседаваше Меги Џиленхол, а негови членови беа туниската режисерка и сценаристка Каутер Бен Ханија, англискиот композитор и уметник Даниел Блумберг, италијанскиот професор Франческо Касети, францускиот режисер и сценарист Ксавие Џаноли, авганистанската режисерка и сценаристка Шахрбану Садат и хонгконшкиот режисер и продуцент Џони То.
Големата награда на жирито му припадна на Ли Чанг-Донг за филмот Possible Love. Остварувањето ја истражува суровоста на современиот систем на труд преку приказните на два брачни пара – отпуштен работник и неговата сопруга, како и документаристка и нејзиниот сопруг.
Сребрениот лав за најдобар режисер го освои Иља Хржановски за филмот DAU, објави „Варајети“.
Специјалната награда на жирито му припадна на израелскиот документарен филм Naza на Јувал Абрахам и Рејчел Зор. Филмот, кој се занимава со нападите на израелската армија врз цивили во Газа, предизвика силни реакции и беше поздравен со рекорден 25-минутен аплауз на премиерата.
За најдобар актер во главната конкуренција беше прогласен Џон Малкович, кој го освои „Купот Волпи“ за улогата во Wild Horse Nine. Наградата дополнително ги зголеми очекувањата дека актерот може да се вклучи во трката за „Оскар“. Малкович, кој моментално е на снимање, не присуствуваше на церемонијата, но се обрати преку видеопорака.
Наградите во програмата „Оризонти“
Во секцијата „Оризонти“ (Orizzonti), наградата за најдобар филм ја освои Diana in the Loop на режисерите Ан Сиро и Рафаел Балбони. Филмот ја следи приказната за млада жена која одлучува да се одмазди за силувањето на нејзината мајка, извршено три години пред таа да се роди.
Наградата за најдобра актерка во придружната програма ѝ припадна на Лалех Марзбан за нејзината храбра изведба без хиџаб во иранската драма Falling House.
Марзбан толкува млада жена чии соништа за манекенска кариера надвор од Иран се попречени од нејзиниот татко, тирански настроен затворски чувар. Таа наградата им ја посвети на жените во Иран, нагласувајќи дека земјата минува низ еден од најболните и најтешките периоди во својата историја.
„Сакам да ги спомнам луѓето од мојата татковина, Иран, кои живеат под најголем притисок досега. Би сакала да им ја посветам оваа награда на жените од мојата земја, кои ја платија највисоката цена дури и за најмалата форма на слобода. Денес, повеќе од кога било, тие продолжуваат да ги негуваат своите соништа, храброста и надежта“, порача актерката на фарси јазик.
Италијанскиот актер Рикардо Скамарчо ја освои наградата за најдобар актер за улогата во The House of the Monkey. Во филмот тој игра посветен татко на син со попреченост, кој се зближува со својот внук-тинејџер, гледајќи во него син каков што отсекогаш посакувал.
Филмот ја доби и наградата за најдобро сценарио, која им припадна на режисерот Томазо Ландучи и коавторот Дамијано Фемферт.
Скамарчо наградата им ја посвети на сите татковци во светот, како и на британскиот продуцент Џереми Томас, добитник на „Оскар“ за најдобар филм за „Последниот император на Кина“. Веста за неговата смрт на 77-годишна возраст беше објавена претходно истиот ден.
„Лавот на иднината – Луиџи Де Лаурентис“, наградата наменета за дебитантски филм, му припадна на камерунско-францускиот режисер Огист Бернар Куемо Јангху за House of the Wind. Филмот го истражува влијанието на миграцијата кон Европа преку приказната за 80-годишната Жозет, која живее сама во Јаунде, Камерун.
Политички наелектризирано фестивалско издание
Церемонијата, која ја водеа италијанските актери Грета Скарано и Николас Маупас, го означи крајот на политички наелектризираното 83. издание на Венецискиот филмски фестивал.
Меѓу филмовите во главната конкуренција беа и „Бункер“ на Флоријан Зелер, со Пенелопе Круз во главната улога, Booking Fastard на Вернер Херцог и „Малку светлина“ на Али Асгари.
Надвор од конкуренцијата беа прикажани и Musk на Алекс Гибни, „Што гради љубовта“ на Расел Кроу и седумчасовната посвета на Лука Гвадањино кон Бернардо Бертолучи, насловена „Радоста на животот“.
Меѓу позначајните моменти на фестивалот беа и доделувањата на „Златниот лав“ за животно дело на Џорџ Клуни и Елен Берстин.
