Поранешниот хрватски тенисер Горан Иванишевиќ е позитивен на кoронавирусот. Откако имал два негативни теста, третиот тест на тренерот на Новак Ѓоковиќ покажал дека тој е заразен со Ковид-19. Ова го потврди и самиот тенисер преку Инстаграм.
„За жал, по два негативни теста во последните 10 дена, штотуку ги дознав резултатите. Денешниот, трет тест по ред е позитивен на Ковид-19. Се чувствувам добро и немам никакви симптоми. Сакам да ги известам сите оние коишто беа во контакт со мене, дека сум позитивен и ќе ги замолам да ги преземат сите потребни чекори за да се заштитат себеси и своите најблиски. Јас продолжувам со својата рано започната самоизолација. Им посакувам на сите заразени што поскоро да закрепнат“ – напишал тој.
Иванишевиќ беше дел од „Адрија тур“ на Новак Ѓоковиќ и во Белград и во Задар. Откако неколку тенисери и нивните блиски се заразија со корона, и Иванишевиќ направи неколку теста, но тие досега беа негативни.
