Американскиот претседател Доналд Трамп воведе серија огромни царини за земјите ширум светот кои би можеле драстично да го променат пејзажот на глобалната трговија, а стоките за широка потрошувачка како што е саканиот iPhone може да бидат меѓу најтешко погодените.
Apple губи милиони во минута
Акциите на Apple паднаа за повеќе од 8 проценти по објавувањето на тарифите на Трамп, што доведе до најлошиот ден на берзата од септември 2020 година. Трамп наметна царини на широк спектар на кинески увозни производи во неговиот прв мандат како претседател за да ги притисне американските компании да го вратат производството во САД или блиските земји како Мексико.
Apple продава повеќе од 220 милиони iPhone телефони годишно, а најголемите пазари ги вклучуваат САД, Кина и Европа.
Најевтиниот модел на iPhone 16 беше лансиран во САД по цена од 720 евра, но сега може да чини дури 1.029 евра, според пресметките засновани на проекциите на аналитичарите на финансиската агенција Rosenblatt Securities, кои велат дека цената може да порасне за 43 отсто – доколку Apple успее да ги пренесе дополнителните трошоци на потрошувачите, според Ројтерс.
Поскапиот iPhone 16 Pro Max, со екран од 6,9 инчи и простор за складирање од 1 терабајт, кој моментално се продава за 1.441 евра, би можел да чини речиси 2.072 евра доколку зголемувањето од 43 отсто се пренесе на потрошувачите.
„Евтиниот“ iPhone никогаш поскап!
iPhone 16e , лансиран во февруари како поевтина варијанта со доволно компјутерска моќ за да работи Apple Intelligence, сет на функции што вклучува интегриран пристап до ChatGPT, чини 540 евра. Зголемувањето на цената од 43 отсто може да го зголеми тој трошок на 771 евро. Може да се зголемат и цените за другите уреди на Apple.
Анџело Зино, капитален аналитичар во CFRA Research, фирма за собирање и анализа на финансиски податоци, вели дека ќе биде тешко за компанијата да пренесе повеќе од 5 до 10 проценти од трошоците на потрошувачите.
– Очекуваме Apple да се откаже од секое големо покачување на цените на телефоните до оваа есен, кога треба да биде лансиран нејзиниот iPhone 17, бидејќи на тој начин обично се справува со планираните зголемувања на цените – рече Зино.
Дури и со префрлање на одредено производство во Виетнам и Индија, повеќето iPhone телефони сепак ќе се произведуваат во Кина, а од тарифите не се поштедени ниту тие две земји, при што Виетнам доби тарифи од 46 отсто, а Индија 26 отсто.
Apple ќе треба да ги зголеми цените во просек за најмалку 30 проценти за да ги надомести увозните тарифи, вели Нил Шах, ко-основач на фирмата за истражување на пазарот „Контерпоинт Рисрч“.
