Низ целиот свет, првите зраци на сонцето ја најавуваат мелодичната песна на птиците, но научниците сè уште се обидуваат да откријат зошто птиците чувствуваат потреба за толку гласен утрински концерт. Ново истражување, кое сè уште чека рецензија, нуди можен одговор со проучување на однесувањето на птиците Taeniopygia guttata.
Интензитетот на нивните песни се чини дека е воден од исчекувањето на изгрејсонцето кое се зголемува во текот на ноќта, објавува Science Alert.
Во лабораториски услови, мажјаците од овој тип птици спонтано пеат стотици песни кога има светлина, но замолкнуваат во целосен мрак. Овој факт ги поттикна научниците да истражат точно како интеракцијата на ноќта и денот влијае на утринското пеење.
Кога истражувачите вештачки го одложиле изгрејсонцето за три часа во еден експеримент, држејќи ги светлата исклучени, пеењето на птиците станало поинтензивно и започнало порано од вообичаеното, како птиците нетрпеливо да чекаат почеток на денот.
Важно е да се напомене дека доцнењето на светлината не значело дека птиците спиеле подолго – тие биле будни во своето вообичаено време и активно се движеле во темница, воздржувајќи се од пеење. Нивното нетрпение било потврдено со дополнителен тест: кога им бил понуден прекинувач што можел да ја вклучи светлината 10 секунди, птиците во услови на доцнење на зората го користеле почесто, за разлика од птиците за кои зората дошла порано.
„Птиците се будат во темница долго пред зори, веројатно преку хормонални механизми поврзани со мелатонинот, а нивната внатрешна мотивација за пеење се зголемува, додека спонтаното пеење е потиснато од темнината“, објаснува тимот предводен од биологот Еднај Баросо дос Сантос од Корејскиот институт за истражување на мозокот. Една теорија е дека ова интензивно утринско пеење им помага на птиците да ги загреат гласните жици по ноќниот одмор. Ова им овозможува брзо да ги усовршат своите перформанси и да ги зголемат шансите за репродуктивен успех во текот на денот.
Иако студијата е спроведена на птици во заробеништво, научниците веруваат дека резултатите би можеле да се применат и на птиците во дивината. „Бидејќи функцијата на вокалната вежба е предложена и за утринскиот хор на птиците кај дивите птици кои пејат, ние сугерираме дека овие механизми и функции може да бидат применливи, барем делумно, на утринскиот хор на птиците што генерално се забележува кај дивите птици“, заклучува тимот во труд објавен на складиштето bioRxiv.
фото: принтскрин
