Утринските навики можат да имаат големо влијание врз здравјето и долговечноста. Една од едноставните активности кои експертите ја препорачуваат е медитацијата – практика која трае само неколку минути и му помага на телото да се смири и поефикасно да се справи со стресот. Редовната медитација, според истражувањата, може да го промени начинот на кој телото реагира на стрес и да го забави процесот на стареење.
Студијата објавена во 2023 година покажа дека само десет минути медитација го подобрува вниманието и менталната флексибилност, а учесниците пријавиле и пониски нивоа на стрес. Иако краткорочното намалување на стресот можеби не изгледа значајно, хроничниот стрес може да доведе до забрзано стареење на телото, зголемено воспаление и оштетување на клетките. Телото под постојан стрес ги троши своите резерви побрзо и старее побрзо.
Новото истражување го испитуваше долгорочниот ефект на трансценденталната медитација, која се прави во тишина 20 минути додека се дише и се повторува мантра. Луѓето кои медитирале од 12 до 40 години имале пониски нивоа на ген поврзан со воспаление (SOCS3) и пониски нивоа на хормонот на стрес кортизол и неговата неактивна форма, кортизон.
„Намалениот сооднос на кортизол и кортизон кај луѓето кои медитираат укажува на поголем отпор, поголема адаптација и придонесува за целокупното здравје и долговечноста“, вели професорот по природна медицина и превенција д-р Кенет Волтон.
Истата студија покажа дека медитацијата може да го забави когнитивниот пад. Постарите учесници кои медитирале со децении имале резултати на тестовите за внимание и брзина на обработка на информации слични на помладите луѓе. „Постарите практичари на медитација постигнаа резултати споредливи со младите луѓе, дополнително потврдувајќи го заштитниот ефект на медитацијата против когнитивното опаѓање во староста“, заклучил научникот д-р Фредерик Тревис.
