Покрај позитивните ефекти врз физичкото здравје, оваа навика има и неверојатно влијание врз менталното здравје на една личност и го намалува нивото на анксиозност.
Дневното одење е една од наједноставните и најкорисни навики за одржување на здравјето, а експертите објаснија колку долго треба да одите секој ден, особено по 50-годишна возраст.
Имено, одењето е дел од кардио активност со низок интензитет што има позитивен ефект врз мозокот, помага во контролата на телесната тежина, ја подобрува рамнотежата и го намалува ризикот од болести како што се висок крвен притисок и дијабетес.
Редовните прошетки ви помагаат да останете силни и подвижни во текот на вашите години, а престојот на отворено и ритмичкото движење имаат позитивен ефект врз расположението и стресот. Според докторот д-р Рубен Чен, потребни се околу 30 минути на ден.
„Повеќето препорачуваат најмалку 30 минути одење дневно. Пократки периоди од 10 до 15 минути, два до три пати на ден, се исто така корисни. Доследноста во овој процес е најважна“, изјави докторот за „Параде“.
Дополнително, редовните прошетки се важни како што старееме бидејќи помагаат во забавување на природното губење на мускулната маса. Редовното одење ги зајакнува мускулите на нозете, ја подобрува флексибилноста, силата и издржливоста и ја намалува вкочанетоста во колената и колковите.
„За разлика од понапорните активности, одењето е достапно, не бара опрема и лесно се прилагодува на секое ниво на физичка подготвеност, што го прави една од најкорисните активности за здраво стареење“, рече д-р Чен.
Покрај физичките придобивки, докторот истакнува дека одењето носи и важни ментални придобивки.
„Одењето го стимулира лачењето на ендорфини и го намалува хормонот на стрес кортизол, што ги намалува нивоата на анксиозност и стрес, и го подобрува расположението, особено на свеж воздух“, тврди докторот.
