Што навистина се случува во машкиот мозок за време на сексуалниот однос? Прашање кое со години ги интригира и научниците и јавноста, конечно добива појасен одговор. Ново истражување открива дека за време на сексот во мозокот се одвива прецизно синхронизиран „хемиски танц“, кој ги контролира различните фази на сексуалниот однос и води до ејакулација.
Истражувањето било спроведено на машки глувци, но научниците нагласуваат дека мозочните региони и невротрансмитерските системи поврзани со сексуалната функција се многу слични и кај луѓето. Затоа, резултатите би можеле да придонесат за развој на нови третмани за предвремена ејакулација и други сексуални нарушувања.
Авторот на студијата, д-р Аи Мијасака од Универзитетот Цукуба во Јапонија, истакнува дека досега повеќето истражувања биле насочени кон почетокот на сексуалната активност, додека она што се случува во мозокот за време на целиот сексуален чин останало недоволно истражено.
За да го расветлат овој процес, научниците ја следеле мозочната активност на машките глувци во текот на сите фази на парењето – од сексуалната возбуда, преку пенетрацијата, до ејакулацијата.
Во фокусот на истражувањето бил nucleus accumbens, дел од мозокот кој е тесно поврзан со чувството на награда и задоволство. Во оваа регија биле поставени специјални флуоресцентни сензори кои го следеле ослободувањето на две клучни хемиски супстанции – допамин, познат како „хормон на задоволството“, и ацетилхолин, невротрансмитер кој има важна улога во регулирањето на допаминот.
Резултатите покажале исклучително координирана активност меѓу овие две супстанции. Непосредно пред почетокот на сексуалниот однос, мозокот започнувал ритмично да ослободува ацетилхолин. Неколку секунди подоцна следело ослободување на допамин.
За време на пенетрацијата, концентрациите на двете хемиски супстанции се менувале синхронизирано со движењата, а во моментот на ејакулацијата ослободувањето на допамин најпрво се забавувало, а потоа нагло се зголемувало.
Според д-р Кингхуа Лиу од Националниот институт за биолошки науки во Пекинг, истражувањето покажува дека невротрансмитерите работат во тесна координација и го регулираат преминот низ различните фази на сексуалното однесување.
Иако сексуалното однесување кај глувците не е идентично со човечкото, научниците сметаат дека основните мозочни механизми се многу слични. Токму затоа ова откритие може да биде важна основа за подобро разбирање на човечката сексуална функција.
Особено значајна е можноста резултатите во иднина да придонесат за развој на нови терапии за предвремена ејакулација – состојба која, според проценките, погодува меѓу 20 и 30 проценти од сексуално активните мажи.
Авторите на студијата, објавена во научното списание Neuron, нагласуваат дека ова е само почеток и очекуваат идните истражувања дополнително да ги разјаснат молекуларните и нервните механизми кои го контролираат времето на ејакулација и ќе овозможат развој на поефикасни третмани за сексуалните дисфункции.
