Во градскиот парк во Стар Дојран беше претставена урбана инсталација во форма на срце, изработена во знак на благодарност кон хуманоста на семејството на Емилија Динева, првиот дарител на срце и органи во Северна Македонија.
„Идејата на оваа акција е уште еднаш да се оддаде почит на Емилија Динева и нејзиното семејство за овој несебичен чин и преку јазикот на уметноста да се поттикне органодарителството како врв на хуманост и можност за спасување на стотици животи. Скулптурата ‘Срце за вечноста’ на младиот академски скулптор Андреј Миневски е водена од идејата да се овековечи дарувањето на органи како еден од највисоките чинови на човековата хуманост и можност кога еден живот згаснува друг да се распламти, односно, како што најчесто и бива, да започне одново. Авторот го овековечува херојството на Динева и нејзиното семејство отворајќи и го патот до бесконечноста и незаборавот“, велат иницијаторите на акцијата.
Скулптурата е работена во техника која опфаќа спој на различни материјали, како мермерно брашно, епоксид, метал изработени во стандарден скулпторски опус и доведени до совршенство од вештата рака на авторот.
Реализацијата на проектот е на Центарот за современи уметности – Скопје и Општина Дојран со финансиска поддршка од Фондацијата отворено општество – Македонија.
Скулптура во чест на Емилија Динева, првиот дарител на срце и органи, поставена е во градскиот парк во Дојран
