Граѓаните на Швајцарија на денешниот референцум изгласаа за легализирање на истополовите бракови и им дадоа право на геј сопружниците да посвојуваат деца.
За легализацијата гласаа речиси две третини од Швајцарците. Земјата стана една од последните на западот на Европа, која ги легализираше геј браковите.
Според податоците кои ги објави сојузната влада, 64,1 процент од бирачите гласаа за истопловите бракови.
„Многу сме среќни и растеретени“, рече Антонија Хаусвирт, од националниот комитет „Бракови за сите“, додавајќи дека приврзаниците на истополовите бракови ќе одржат прослава во Берн.
Организацијата „Емнести интернешенел“, соопшти дека со ова гласање е направен крупен чекор во еднаквоста. Ова исто така ќе значи дека странските сопружници полесно ќе добиваат швајцарско државјанство.
Министерката за правда на Швајцарија Карин Келер Зутер, рече дека законот ќе стапи на сила од 1 јули 2022 година.
