Меланија Трамп по втор пат ќе биде прва дама на САД. За тоа може да се заблагодари првенствено на случајната средба во 1987 година во главниот град на нејзината родна Словенија и на фотографот Стан Јерко за нејзиното патување до Белата куќа.
„Излегував од модна ревија во Љубљана и ја видов пред зградата. Веројатно чекаше пријател“, изјави словенечкиот фотограф Јерко за Ројтерс во 2016 година. „Ја забележав бидејќи беше висока и слаба. Пријдов и предложив тест фотосесија.
Резултатот беа црно-бели фотографии на 17-годишната Мелани Кнавс кои ја започнаа нејзината манекенска кариера, што ја однесе во Милано и Њујорк, каде што го запозна Доналд Трамп на забава во 1998 година.
Меланија во Љубљана почна да се занимава со манекенство откако ја освои титулата прва придружничка на Мис Словенија во 1992. „На почетокот беше срамежлива, но брзо научи и покажа интерес за секој детал од фотографирањето“, вели Јерко. „Таа беше како заспана кукличка преобразена во гламурозна пеперутка“.
Жителите на градот Севница во југоисточна Словенија, на триесетина километри од хрватската граница, каде што пораснала Меланија, претходно за медиумите открија дека нејзиниот татко продавал автоделови, а нејзината покојна мајка работела како шивачка во фабрика за детска облека.
„Кога видов со кого се омажи, ја забележав сличноста меѓу Трамп и нејзиниот татко“, изјави пред неколку години пријателката од детството Мирјана Јеланчич. „Има физички сличности, и двајцата се работохоличари. Мислам дека во него најде сроден дух, некој со кого се чувствува безбедно“, додала таа.
Меланија студирала дизајн и архитектура на Универзитетот во Љубљана, но се откажала, за да се занимава со моделство. Веќе во средината на 90-тите, нејзината кариера доби меѓународни размери и се пресели во Милано и Париз, каде што работеше со големи модни куќи.
Дополнително, таа го промени своето име од Меланија Кнавс во Меланија Кнаус за да привлече поширока публика. „Тоа беше одлична можност и не сакав да ја пропуштам можноста да ја креирам мојата иднина на глобално ниво“, рече таа еднаш за преселбата во странство.
Во 1996 година, Меланија се пресели во Њујорк, што означи пресвртница во нејзиниот живот. Во САД, таа доби можност да работи со престижни модни списанија, вклучувајќи ги Vogue и Vanity Fair. Но, клучниот момент се случи во 1998 година, кога таа го запозна Доналд Трамп, тогаш етаблиран бизнис магнат и медиумска личност.
Тие се запознале на забава за време на Модната недела во Њујорк и тогаш започнала нивната врска, која набрзо ја донела во центарот на американскиот социјален и политички живот.
„Од моментот кога започна нашиот разговор, ме плени неговиот шарм и леснотија. Имаше толку многу раздвижена активност околу нас, но неговиот фокус на нашата интеракција направи да се чувствувам како да сум во центарот на неговиот свет“, напиша Меланија.
„Тоа беше освежувачки одмор од вообичаениот, површен разговор и се најдов себеси привлечена од неговата енергија“, додаде таа.
Сепак, Доналд тогаш не бил сам, туку бил придружуван од друга жена. „Кога таа замина за момент, ми го побара бројот на мобилниот телефон“, рече таа. Меланија го одбила, што го изненадило. Наместо тоа, таа го замолила Доналд да и го даде својот број, што тој со задоволство го прифатил под еден услов.
„Ќе ти го дадам мојот број ако ветиш дека ќе се јавиш“, ѝ рекол тогаш, се присети Меланија. „На почетокот не бев сигурна за Доналд, но ме импресионираше неговата решителност и начинот на кој го гледа светот“, се присетува Меланија во едно интервју од тој период.
Доналд и Меланија се верија во 2004 година, а се венчаа во јануари 2005 година на церемонија во Палм Бич, Флорида.
На венчавката присуствуваа бројни познати личности, меѓу кои и поранешниот претседател Бил Клинтон и Хилари Клинтон. Во 2006 година, парот го доби синот Барон, а во истата година Меланија официјално доби американско државјанство.
Кога Доналд Трамп победи на претседателските избори во 2016 година, Меланија стана првата дама на САД. Тоа беше само втор пат во историјата жена родена надвор од САД да стане прва дама на таа земја. Првата беше Луиза Адамс, сопругата на шестиот американски претседател Џон Квинси Адамс.
