Деменцијата е растечки глобален здравствен проблем, а бројот на заболени постојано се зголемува. Според една студија од 2024 година, 120 милиони луѓе во моментов страдаат од когнитивно опаѓање и Алцхајмерова болест, а оваа бројка се очекува да достигне 150 милиони до 2030 година и 190 милиони до 2050 година. За среќа, истражувањата покажуваат дека одредени животни навики можат да го намалат ризикот од развој на деменција, а една од клучните мерки е физичката активност.
Новото истражување на Факултетот за јавно здравје Џон Хопкинс покажа дека само 35 минути неделно физичка активност – или пет минути дневно – може да го намали ризикот од деменција во просек за 41 процент. Ова е точно без оглед на возраста или нивото на сила, па дури и постарите и послабите луѓе можат да имаат корист од лесните активности како одење или пливање.
Студијата покажа дека ризикот дополнително се намалува со зголемување на времето за вежбање.
Учесниците кои вежбале од 35 до 69,9 минути неделно (пет до десет минути дневно) имале 60 отсто намалување на ризикот, додека оние кои вежбале 70 до 140 минути неделно (10-20 минути дневно) имале 63 отсто намалување на ризикот.
„Нашите наоди сугерираат дека зголемувањето на физичката активност, дури и само пет минути на ден, може да го намали ризикот од деменција кај постарите возрасни лица“, рече авторот на студијата Амал Ванигатунга за „Парада“.
Ова истражување дополнително потврдува дека секоја физичка активност, без разлика колку е мала, е подобра од никаква, особено кога се работи за болест за која моментално нема лек.
