Холивуд славеше – Емили Блант и Стенли Тучи, омиленото дуо од култниот филм Ѓаволот носи Прада, добија свои ѕвезди на прочуената Холивудска патека на славните, станувајќи 2841-та и 2842-ра личност што го добиле ова престижно признание.
Двајцата актери заедно се искачија на сцената, каде што со емотивни говори ја споделија својата благодарност, но и силната лична и професионална поврзаност која трае со години.
Блант не ја криеше својата возбуда, истакнувајќи дека моментот е еден од најзначајните во нејзината кариера.
„Тешко е да се опише колку ми значи ова. Луѓето кои зборуваа за мене денес го направија мојот живот вистинска привилегија“, рече таа, додавајќи дека е особено горда што го дели овој момент со Тучи, своето семејство и најблиските.
Тучи, пак, со својот препознатлив хумор и топлина им се заблагодари на своите пријатели и колеги, но не пропушти и да се пошегува на сметка на долгогодишното пријателство со Блант.
„Чест и привилегија е да се биде дел од Холивуд толку години, но најмногу ми значат луѓето со кои го споделив тој пат“, изјави Тучи.
Церемонијата беше вистински спектакл, со присуство на некои од најголемите имиња во филмската индустрија. Меѓу говорниците беа Мет Дејмон, Двејн Џонсон, Роберт Дауни Џуниор и легендарната Мерил Стрип.
Дејмон ги нарече „двајца од најомилените луѓе во Холивуд“, додека Џонсон ја опиша Блант како „неверојатно присутна и инспиративна личност“. Дауни Џуниор ја пофали нејзината професионалност и смиреност, нарекувајќи ја „речиси совршен човек“.
Најемотивниот момент дојде од Мерил Стрип, која со топли зборови ги опиша своите колеги.
„Емили, се чувствувам како да те родив. Горда сум на тебе“, рече Стрип, додека за Тучи додаде дека е „невозможно да не го сакаш – елегантен, духовит и бескрајно талентиран“.
Кариерата на Блант започна во 2004 година, но вистинскиот пробив го доживеа со улогата во „Ѓаволот носи Прада“. Оттогаш таа стана една од најценетите актерки во Холивуд, со улоги во филмови како „Сикарио“, „На работ на утрешнината“ и „Тивко место“.
Тучи, пак, веќе децении важи за еден од најразновидните актери, со богата филмографија која вклучува „Прекрасните коски“, „Игри на глад“ и „Капетан Америка“. Покрај филмот, тој има освоено и награди за телевизиски проекти и документарни серии.
Со ова признание, Блант и Тучи ја заокружуваат својата импресивна кариера, оставајќи траен белег во историјата на филмската индустрија.
