Гвинет Палтроу денеска, 27 септември, го слави 54. роденден. За една генерација публика таа е актерката од „Вљубениот Шекспир“, а за друга — основачката на „Goop“, бренд чии производи и здравствени совети редовно предизвикуваат реакции.
Родена е во 1972 година во Лос Анџелес, во семејство тесно поврзано со филмот и театарот. Нејзиниот татко Брус Палтроу бил режисер и продуцент, а мајка ѝ Блајт Данер е актерка. Гвинет започнала студии по историја на уметноста, но набрзо се откажала за да се посвети на глумата. Татко ѝ првично не ја поддржувал одлуката, а го променил мислењето откако ја гледал во театарската претстава „Picnic“.
Во деведесеттите години се етаблираше како една од најбараните млади актерки во Холивуд. Глумеше во „Se7en“, „Emma“, „Талентираниот господин Рипли“ и „Кралското семејство Тененбаум“. На 26 години го освои Оскарот за најдобра главна женска улога во „Вљубениот Шекспир“.
Подоцна доби и Еми за гостувањето во серијата „Glee“, додека песната „Coming Home“, која ја изведе, беше номинирана за Оскар.
Нов правец во нејзината кариера започна во 2008 година, кога го основа „Goop“. Она што почна како платформа за животен стил постепено прерасна во голем бизнис со производи, медиумски содржини и сопствена серија на „Нетфликс“. Со успехот дојдоа и критики: дел од здравствените тврдења поврзани со брендот беа оспорувани, а некои производи — меѓу нив и прочуената свеќа со необичен мирис — станаа тема на јавни расправи.
Иако во последните години поголемо внимание му посветуваше на „Goop“, Палтроу се врати на филмското платно со драмата „Marty Supreme“ од 2025 година, во која глуми покрај Тимоти Шаламе. Речиси три децении по првиот Оскар, таа повторно привлече внимание и со својата актерска работа.
