Починатиот пејач и кантавтор Ѓорѓе Балашевиќ ќе добие музеј во Нови Сад, пренесуваат српските медиуми. Музејот ќе биде во близина на Кејот и Дунав, места кои Балашевиќ ги опејуваше често во своите песни.
Музејот ќе се изгради на површина од 500 квадратни метри, ќе има галерија, мултимедијална сала, спомен сала и катче за фановите на легендарниот музичар.
Засега нема информации кога ќе почне изградбата на музејот. Според директорот на Јавното претпријатие „Урбанизам“, Душан Миладиновиќ, овој музеј ќе понуди многу забава за сите што го сакаа Балашевиќ:
„Се прави планот за музејот и ќе се гради во рамките на Универзитетскиот парк. Просторот ќе биде спомен-музеј за Ѓорѓе Балашевиќ и ќе има дополнителни содржини, а планирано е и катче за неговите фанови каде што ќе може да се купат ЦД-а и маици“, изјави Миладиновиќ.
За потсетување, Ѓорѓе Балашевиќ почина на 19 февруари, како резултат на компликации од коронавирусот.
