Една година откако српската пејачка Наташа Беквалац го пријави сопругот Лука Лазукиќ за семејно насилство, оти ја натепал, судот во Белград пресуди во нејзина полза. Поранешниот маж на пејачката е осуден на осум месеци затвор и три години условна казна.
„За мене е посебен ден денес. Ден на вистината и на победата на љубовта за мене и за моите деца“, рекла Беквалац по судењето.
Задоволен од пресудата бил и нејзиниот адвокат.
„Лука доби казна од осум месеци затвор, односно условна казна на три години. Тоа значи дека ваквото кривично дело не смее да се повтори во следните три години, а ако го повтори делото, тогаш ќе лежи осум месеци во затвор. Одлуката на судот докажува дека мојата клиентка ја зборуваше вистината и дека е направено кривично дело“, рекол за „Блиц“ адвокатот на пејачката.
На судењето што траело неколку часа, Лука не го сменил своето сведочење и тврдел дека не ја нападнал Наташа. Освен што добил условна казна затвор, судот му ја продолжил и мерката со која му се забранува да ѝ се приближи на пејачката.
