Серијата „Јованка Броз и тајните служби“ почна да се емитува на РТС, а главната улога ја игра Снежана Савиќ, која многу се подготвувала за улогата на Јованка Броз.
– Тоа е приказна за една епоха и време кое го обележаа личности со Јосип Броз Тито на чело, како и неговата придружничка Јованка. Таа е национален херој, офицер и жена која беше одликувана за храброст во војната, една од најубавите жени во светот, која отсекогаш пленела со својот изглед. Има многу нераскажани приказни. Се шпекулираше дека е строга, перфекционистка, отфрлајќи ги сите оние што не ги сакала од различни причини. Јованка била исклучително силна жена – рече Снежана.
– Кон крајот на животот на Тито, кога не беа во добри односи, таа доби покана да ја прослави Новата година со него. Не се согласила на тоа, бидејќи претходно Тито бил вмешан во афера со две масерки. Таа постојано истакнувала дека многу страда и дека само од инает ги надживеала сите непријатели – рече Снежана Савиќ, која ја игра улогата на Јованка по разделбата со Тито и откри како се подготвувала за улогата.
– Учев многу за неа. Нејзината личност, начинот на кој зборувала, одела, нејзината боја на глас, интонација. Се обидов колку што е можно, се разбира со мерка, сето тоа да го пренесам на публиката. Јованка ќе биде прикажана на кредибилен начин. Физички јас потсетувам на неа, имаме слични црти на лицето. Костимите и маската дополнително придонесоа да потсетувам на неа – истакна актерката.
– Верзијата на приказната на Јованка е дека успеале да го разделат од неа, бидејќи таа наводно ја сакала власта и сакала да го преземе престолот. И на крајот, тие успеале да го разделат Тито од Јованка, бидејќи таа премногу се мешала во сè и поставувала различни услови.
Многумина тврдат дека тоа на некој начин му пречело на Тито. Тоа е мое лично видување. И можеби времето го прави своето, можеби само му се здосадило. Жена која постојано го притиска. Тие биле убедени дека таа му штети на здравјето и дека треба да биде сам. Ја одделиле од Тито затоа што премногу се мешала во политиката – вели Савиќ.
