Принцот Вилијам денеска се врати на должноста и го направи своето прво јавно појавување откако поради приватни причини ја пропушти комеморацијата во вторникот за неговиот кум, грчкиот крал Константин Втори.
Неговото отсуство на тој настан предизвика драма во Британија, а експертите посочија дека Палатата треба да биде подиректна во своите соопштенија, односно подетално да каже зошто се случуваат одредени работи, како одлуката на Вилијам да замине во Виндзор. Принцот од Велс денеска ја посети синагогата во центарот на Лондон за да учествува во разговор за порастот на антисемитизмот во Британија.
Тој се сретна со двајца преживеани од Холокаустот, како и со млади луѓе кои учествуваа во проектот „Лекции од Аушвиц“.
„Предрасудите немаат место во општеството. Тоа го кажав и претходно и ќе го повторам. Сакам сите да знаете дека можете да зборувате за тоа и вашите искуства. Кетрин и јас сме крајно загрижени поради порастот на антисемитизмот за кој зборувавте утрово и многу ми е жал ако некој од вас морал да го доживее. Нема место за тоа… затоа сум овде денес да ве уверам сите дека луѓето се грижат и дека луѓето слушаат и дека не можеме да го дозволиме тоа“, рече Вилијам.
Состанокот требаше да се одржи минатиот месец на Денот на сеќавањето на холокаустот и на него требаше да присуствува и Кејт, како што беше планирано пред нејзината операција.
Кејт Мидлтон имаше операција на абдоменот во Лондон на 16 јануари, се опоравува во Виндзор и се чувствува добро, соопштија од палатата. Кралот Чарлс го пропушти настанот поради здравствени проблеми, јавноста на почетокот на месецот дозна дека монархот има рак.
