Топењето на мразот на Антарктикот алармантно се забрзува, при што во изминатите 15 години се стопиле три илјади милијарди тони мраз, се наведува во извештај на меѓународен тим експерти објавен денеска.
Во студијата се наведува дека во последниот четврт век на најјужниот дел на планетата се стопило толкаво количество мраз од кој е добиена вода што би можело да ја прекрие целата територија на американската сојузна држава Тексас во висина до четири метри.
Antarctic ice melting faster than ever, studies show https://t.co/vqb6ThDpFg
— Guardian Environment (@guardianeco) 13 June 2018
Според експертите, ваквото топење на мразот на Антарктикот придонело за покачување на глобалното морско ниво за 7,6 милиметри.
Во истражувањето се наведува дека во периодот од 1992 до 2011 година во просек се топеле по 84 милијарди тони мраз годишно, а од 2012 со 2017 година по 241 милијарда тони.
– Мислам дека треба да се загрижиме, но не значи дека треба да бидеме очајни. Работите, едноставно, се случуваат и тоа побргу отколку што очекувавме – вели Изабела Велкоња од калифорнискиот универзитет, која е една од 88-те коавтори на студијата.
Според друг коавтор на извештајот, Ендрју Шапар од британскиот Универзитет во Лидс, доколку продолжи ваквото темпо на топење, само како резултат на стопениот мраз од Антарктикот, до крајот на векот нивото на морињата би се зголемило 16 сантиметри.
Ова е второ вакво истражување што го изработуваат научници во соработка со американската Национална аеронаутичка и вселенска администрација (НАСА) и Европската вселенска агенција. Целта на студиите е да се следи состојбата со мразот на Антарктикот и околу Гренланд.
