Рециталот „Вечер на белканто и руски романси” кој требаше да се одржи вечерва е откажан, соопшти Националната опера и балет. Оваа одлука следи по бурните реакции во јавноста кои се појавија синоќа на социјалните мрежи поради руската агресија врз Украина.
Организатор на концертот е Елена Сиљаноска од Здружението на руски сонародници ‘Чајка’ која изминативе години постојано организира вечери на руската романса во НОБ.
„Ја почитуваме Резолуцијата што ја донесе Собранието на Република Северна Македонија и немам што повеќе да додадам”, изјави директорот на НОБ Васко Ристов за Нова ТВ, без да наведе друг датум за негово одржување.
Режисер на рециталот е Дејан Прошев, а пијано придружбата требаше да биде на Андреј Наунов.
Меѓу делата што беа подготвени за изведување имаше дела на Перголеси, Скарлати, Белини, Чајковски и Дворжак.
Закажаниот рецитал предизвика бројни реакции бидејќи се работеше за дела на руски автори во момент кога светот во знак на поддршка за Украина ѝ наметна санкции на Русија кои опфаќаат економски, комуникациски и културни мерки.
