„Нетфликс“ ги откупи правата за романот на Габриел Гарсија Маркес „Сто години самотија“ за да сними серија на шпански јазик. Книгата напишана во 1967 година е продадена во 47 милиони примероци и преведена на 46 јазици, но, за разлика од некои други дела на колумбискиот нобеловец, од неа досега не е снимен нити еден филм или серија.
„Серијата ќе се снима главно во Колумбија, а синовите на Маркес, Родриго и Гонсало, ќе бидат извршни продуценти“, објави „Нетфликс“.
„Со децении нашиот татко се двоумеше околу продажбата на правата за ‘Сто години самотија‘, зашто веруваше дека не може да се направи доволно долг филм и исто така сметаше дека тој мора да биде исклучиво на шпански јазик. Но, сега сме во златно доба на ТВ-серии и широката публика полесно прифаќа програми на други јазици, па времето не може да биде подобро“, рекол неговиот син Родриго Гарсија.