Православните верници на 30 јули го одбележуваат празникот на света великомаченичка Марина, во народот познат како Огнена Марија, која се почитува како борец за христијанската вера и заштитничка на жените.
Според народното верување, Света Марина пали и казнува со оган исто како што Свети Илија казнува со гром. Таа спаѓа во огнени светци.
Обичај е на овој празник, кога поради големата жештина гори и небото и земјата, ништо да не се работи. Во преданијата има примери за оган и громови кои во врелите празнични денови го палеле житото, сеното и домовите на луѓето што работеле на овој празник.
