Од утре започнуваат Божиќните пости кои ќе траат до 7 јануари 2020 година. Во текот на овој пост, понеделник, среда и петок се пости на вода (т.е. јадеме јадења готвени без масло и јадеме риба). Вторник и четвртк се пости со масло, а сабота и недела е дозволено да се јаде и риба.
Еве 7 рецепти за посни јадења кои можете да ги подготвите за време на првите седум дена.
1. Среда: Чорба од шампињони и компир
Потребно: 600 гр компири, 400 гр. шампињони, поголема главица кромид, 1 праз, 1 морков, зачин од зеленчук, сол, бибер, магдонос, ловоров лист, лажица брашно или густин.
На вода издинстајте го кромидот и празот. Додадете го исечениот на коцки компир и морковот сечен на кругови. Зачинете. Долијте вода. Додајте го ловоровиот лист и варете додека зеленчукот не омекне. Додајте ги печурките исечени на листови.
По половина час варење, извадете го ловоровиот лист. Брашното разматете го со малку вода додека не ги снема грутките, па додајте го во чорбата. По пет минути варење, тргнете ја од оган. Додајте магдонос.
2. Четврток: Рижото со зеленчук
Потребно: 200 гр пченка шеќерец, 200 гр ориз, 200 гр грашок, 1 главица кромид, 2 моркови, сусам по желба, масло, сол, бибер, магдонос.
Во длабок сад издинстајте го кромидот и морковот кој сте го изрендале, а потоа додајте го останатиот зеленчук. Посолите и ставите малку бибер, а потоа налијте вода (околу 1,5 л) и оставете го да се вари.
Оризот добро измијте го и додајте го скоро готовиот зеленчук. Оставете да врие 5 минути, а потоа поклопете го тенџерето и тргнете го од оган. Додајте го препечениот сусам.
Додајте свеж или сув магдонос. По 15 минути, отворете и измешајте. По десетина минути може да го послужите, а како прилог користете сезонска салата.
3. Петок: Пиперки полнети со буковка
Потребно: 300 гр ориз, 300 гр. буковка, 1 праз, сол, бибер, босилок, 8 пиперки, 300 мл. сос од домати, малку вода.
Празот и буковката ситно исечкајте ги па измешајте ги со измиениот ориз, сето тоа зачинете го со бибер, сол и наполнете ги пиперките со таа смеса. Може да користите и суви пиперки, но за тоа ќе ви бидат потребни повеќе пиперки.
Полнетите пиперки ставете ги во длабок сад и налејте го сосот од омати и малку вода. Садот можете да го ставите на рингла и да готвите околу еден час или пак да ги оставите во рерна.
4. Сабота: Риба
Потребно: 4 риби, малку масло, малку лимон, сол и бибер.
Рибата исчистете ја, добро посолети, ставете бибер и маслиново масло и наредете ја во огноотпрен сад. На неа исечете лимон, прекријте ја со алуминиумска фолија и ставете да се пече во загреана рерна на 250 степени. Печете половина час па тргнете ја фолијата и печете уште 15 минути.
Со рибата може да послужите и варен компир или карфиол и брокула.
5. Недела: Салата од тестенини и туна
Потребно: тестенини (да бидат посни), 2 концерви туна, 5 кисели краставички, 150 гр. пченка шеќерец, 150 гр посен мајонез, малку сол, бибер, оригано.
Сварете ги тестенините, исцедете ги и измијте ги под млаз вода. Оставете ги настрана. Сварете ја пченката и додајте ја во тестенините. Додајте парчиња туна, мајонез и зачини, па сето тоа измешајте го. По желба, можете да додадете и маслинки.
6. Понеделник: Крем чорба од домати
Потребно: 500 мл течен домат, 300 мл. вода, 2 моркови, 1 главица кромид, 2 компири, сол и бибер, малку магдонос.
Кромидот, морковот и компирот сварете ги во малку вода, потоа со маталки од миксерот сомелете и додајте го течниот домат. Оставете да врие 15 мнути, додајте сол и бибер и сувиот магдонос. Топлата чорба послужете ја со коцки сув леб.
7. Вторник: Тавче-гравче
Потребно: 500 гр бел грав, 250 гр кромид, малку масло, малку бибер, суви мелени пиперки и сол, ловоров лист.
Ставете го гравот во лонец и налејте вода колку да го покрие. Пуштете го да се проврие па истурете ја таа вода, додајте нова и во неа додате го крупно исечениот кромид. Кога гравот ќе се свари така што се одвојува од кората, додајте ја запршката од масло, брашно и пипер. Запржете го гравот и оставете да врие уште неколку минути. Потоа, додадете го ловоровиот лист и додајте го во огнооптпорен сад.
Печете го во рерна на 250 степени целзјусови додека не закорави. Послужете го топло со туршија.
