Ново американско истражување покажало дека лековите против холестерол, познати како статини, ја намалуваат смртноста од Ковид-19, пренесува порталот „Медикал њуз тудеј“. Група американски научници, вклучително и кардиолози кои се грижеле за лица заболени со корона, го испитувале влијанието на лековите врз оваа болест. Статините, покрај нивната примарна цел, имаат силно антиинфламаторно, антикоагулантно и антивирусно дејство, а сето тоа може да придонесе да се намалат компликациите поврзани со тешката клиничка слика на коронавирусот.
Испитувачите го споредиле исходот од третманот на 1.296 пациенти хоспитализирани поради Ковид-19. Половина од нив редовно користеле статини пред инфекцијата, а половина не. Научниците откриле дека употребата на статин кај испитаниците ја намалува смртноста за 50 проценти еден месец по хоспитализацијата.
Ова е најголемата студија од ваков вид досега спроведена, но не е единствената. Истражувањето спроведено лани во Сингапур покажа дека луѓето кои користат статини имаат помала веројатност да завршат на оддел за интензивна нега поради коронавирус, отколку оние кои не ги земаат како вообичаена терапија.
Американско истражување, исто така, открива дека пациентите кои користат статини побрзо се опоравуваат од коронавирусот.
Научниците сметаат дека ова се случува бидејќи статините, покрај тоа што го намалуваат воспалението и ризикот од згрутчување, го отстрануваат холестеролот од надворешните обвивки на клетката. Рецепторите на кои се врзува САРС-КоВ-2, вирусот што предизвикува Ковид-19, се наоѓаат токму во делот на клеточната мембрана каде се таложи холестеролот. Без него, вирусот не може да навлезе во клетката, покажуваат резултатите од студијата.
„Ако клиничките истражувања ги потврдат резултатите, статините би можече да се покажат како евтина и ефикасна терапевтска стратегија во борбата против Ковид-19“, изјавил шефот на студијата, д-р Махеш В. Мадхаван, кардиолог од Медицинскиот центар Ирвинг на Универзитетот Колумбија во Њујорк.
