ВЛЕН со нова политичка реакција во која го поврзува актуелниот случај со Артан Груби со позиционирањето на Бујар Османи во рамките на ДУИ, обвинувајќи го поранешниот министер за надворешни работи дека подолго време молчел за својот поранешен сопартиец.
Од ВЛЕН велат дека денес изразот „пеењето на Бујар Османи“ добива ново значење, бидејќи, како што наведуваат, Артан Груби се соочува со правдата, додека Османи „го чека моментот да го направи чекорот кон врвот на ДУИ“.
„Со месеци Бујар молчеше за Груби, иако некогаш двајцата беа на врвот на ДУИ. Денес се однесува како да немале никаква заедничка политичка историја“, се наведува во објавата на ВЛЕН.
Од коалицијата дополнително обвинуваат дека Османи, наместо функцијата министер за надворешни работи да ја користел исклучиво за државните интереси, ја користел и за внатрепартиски пресметки и за сопствено позиционирање во ДУИ.
„Наместо мандатот како министер за надворешни работи да го користи за интересите на државата, Бујар го користеше за своите сметки во ДУИ, ‘пеејќи’ на различни страни и правејќи пресметки за врвот на партијата“, тврдат од ВЛЕН.
Според нив, политичката слика сега станува сè појасна – Груби е пред суд, Али Ахмети е под притисок, а Османи, како што велат, ја чека шансата за претседателската позиција во ДУИ.
Од ВЛЕН поставуваат и неколку прашања до Османи.
„Зошто Бујар молчеше за Груби кога заедно беа на врвот на ДУИ? Што знае тој за оваа приказна и зошто денес се однесува како Груби никогаш да не постоел?“, прашуваат од коалицијата.
Во реакцијата се додава дека во политиката не е важно само кој зборува, туку и зошто некој молчел до одреден момент.
„Ако ‘пеењето’ на Бујар било за правда, нека го каже тоа отворено. Ако било за власт и за столчето на Али Ахмети, тоа веќе сите почнуваат да го разбираат“, наведуваат од ВЛЕН.
На крајот од реакцијата, коалицијата порачува:
„Груби нека одговара пред правдата. Бујар нека одговара пред граѓаните.“
Станува збор за политички ставови и обвинувања изнесени од ВЛЕН, за кои во самата објава не се приложени дополнителни докази.
