Советот на Месната заедница Галичник информираше дека по разгледување на сите пристигнати апликации, за зет и невеста на Галичката свадба 2026 се избрани Александар Пендароски и Мартина Михајлова.
„Годинава интересот беше исклучително голем, со повеќе квалитетни и искрени пријави, што ја направи одлуката особено предизвикувачка.
Она што особено се истакна во нивната апликација е нивната длабока и искрена поврзаност со Галичник – како место кое не го доживуваат само како традиција, туку како дом, спомен и животна припадност.
Дополнителна симболика и тежина на нивниот избор дава фактот што оваа година се одбележуваат 35 години од првата современа Галичка свадба (1991), кога биле венчани родителите на Александар.
За нив, ова претставува продолжување на една семејна традиција и длабока врска со корените.
Веруваме дека Александар и Мартина достојно ќе ја понесат честа да бидат зет и невеста, претставувајќи ја автентичноста, вредностите и духот на Галичник“, соопштија од Месната заедница Галичник.
