Портпаролката на СДСМ, Богданка Кузевска, пред да влезе во политиката беше новинар. И денес за себе вели дека е новинар, иако работата како портпарол е поголем предизвик.
На прашањето како е да се биде жена во политиката вели: „Потешко од тоа да си маж. Кога мажот е строг и ќе пресече нешто со збор, тој е професионалец. А жените кога ќе викнат, за жал, или се кучки или се хистерични или емотивно не исполнети“.
Не ретко била мета на говор на омраза, невкусни коментари, закани. „Ме боли кога тие коментари ќе ги прочита мајка ми, сопругот, татко ми. Сум добивала и заканувачи пораки во два ноќе, па се научив да се носам со тоа“, искрена е Кузеска.
Онаа другата страна за неа, за која малкумина знаат, е многу интересна и првпат ја раскажа за Репортер.
Мајка на два сина, стружанка која по традиција прво учела да плива на Дрим, а стигнала и до Дунав.
„Ние стружани во езерото не се бањаме, прво во Дрим пливаме. Тоа е традиција. Но, да ти кажам, сопругот е од Кладово на граница со Романија, па затоа и имав прилика да пливам во Дунав. Побрзо оди водата и поголем е предизвикот“, раскажува Кузевска.
Десет години е во љубов со Горан кој е музичар, со кого се запознале на свирка. Тие се во неформален брак.
„Неформален брак е одлука која не си ја кажал со збор, ама се случила. Стигнавме до веридба, а ние секако си се нарекуваме сопруг и сопруга. Имаме две деца и обврски кон нив,“ вели Кузевска за „Репортер“.
Со Богданка зборувавме сешто. Од црвениот кармин кој не може да го стави за на прес, до името за кое низ насмевка вели „едвај го кажував од срам“, за неформалниот брак, и дали родителите ја тераат да се венча, зборуваме и за говорот на омраза, заканувачките пораки, времињата кога беше новинар… гледајте го интервјуто.
Александра Георгиев
