Пејачката Елена Ристеска ја доби наградата „Личност на годината во светот на поп музиката“, на манифестацијата што се одржа во Соко Бања, Србија. Таа се пофали дека е една од седумте дами кои се наградени во разни области. Рече и дека оваа награда ѝ е посебно драга, оти во Македонија веќе немало меродавни манифестации кои ги наградуваат успесите на јавните личности.
„Уште една награда на моите полици дома, меѓутоа уште една сатисфакција и спомен во моето срце и уште едно признание за овие 19 години музичка кариера. За жал, во мојата земја сè помалку постојат меродавни манифестации за успесите на јавните личности. Како и да е, сите награди ми се значајни особено оние кои доаѓаат од странство, тоа е знак дека добро ја претставувам својата земја Македонија во светот“, напиша Елена на Инстаграм.
На настанот Елена се дружеше и со црногорскиот пејач Бојан Маровиќ, а рече и дека интервју ѝ правела Сузана Манчиќ.
Пејачката неодамна во Истанбул ја доби наградата за најдобар македонски уметник.
