Овие кифлички се доволно едноставни за почетници, а толку се вкусни што и искусните домаќинки со задоволство ги приготвуваат кога сакаат да ги израдуваат домашните со топло печиво.
Домашните кифлички се едни од оние печива кои ги спојуваат едноставноста во подготовката и неодоливиот домашен мирис и вкус. Без разлика дали се полни со сирење, шунка, џем или чоколадо, тие се секогаш добредојдени – за појадок или вечера, а неизоставен дел се од сите прослави.
Тајната на добрите кифлички е во добро замесеното, меко тесто кое убаво нараснува, како и во правилното печење, кое им дава златна боја и крцкава коричка.
Состојки:
За тестото:
- 1 кг меко брашно
- 1 кесичка сув квасец или околу 40 г свеж
- 100 мл топло млеко (за активирање на квасецот) + дополнително млеко по потреба
- 1 лажиче шеќер
- 1 лажиче сол
- 1 јајце
- 150 мл масло (може и омекнат путер/маргарин)
- По желба: малку млеко, кисела вода, павлака за помеко тесто
За филот (по избор):
- сирење
- шунка
- џем
- чоколаден крем
- За премачкување:
- 1 јајце
- сусам (по желба)
Приготвување:
Најпрво, активирајте го квасецот. Во топло млеко додајте лажиче шеќер и здробете го квасецот. Оставете го 10 минути да се активира – треба да запени и да нарасне.
Во поголем сад измешајте брашно и сол. Направете вдлабнатина, сипете го активираниот квасец, јајце, масло и преостанатото млеко. Месете додека добиете мазно, меко и нелепливо тесто. Ако е тврдо – додајте малку млеко. Ако е премногу меко – доставете брашно. Покријте го садот со крпа и оставете го тестото 30-60 минути да нарасне двојно.
Кога тестото убаво ќе нарасне, премесете го и поделете го на помали топчиња. Секое топче расучете го во круг и пресечете го на триаголници. На поширокиот дел од секој триаголник ставете го филот по желба. Внимателно завиткајте ги кифличките од поширокиот кон потесниот крај.
Наредете ги кифличките на плех обложен со хартија за печење. Премачкајте ги со изматено јајце и посипете со сусам. Печете ги во претходно загреана рерна на 200 степени околу 20 минути додека добијат убава златна боја и миризлива коричка.
