Шпанскиот тенисер Карлос Алкараз го победи Новак Ѓоковиќ во финалето на Вимблдон со 3:2 во сетови и стигна на првото место на АТП листата. Ѓоковиќ рече дека иако е помлад 16 години од него Шпанецот заслужено е лидер на АТП листата.
„Карлос докажа дека е најдобриот тенисер на планетата, во тоа нема сомнеж. Игра фантастичен тенис на сите подлоги и заслужува да биде таму каде што е сега“, рече Ѓоковиќ.
Иако му годат убавите зборови, Карлос на новинарите им рече дека сè уште не се чувствува како најдобар на светот и дека сè уште го смета Ѓоковиќ за број еден во тенисот.
„Сè уште мислам дека Новак е најдобар и ова го мислам искрено“, рече Карлос и додаде: „Морам да го победам повеќе од еднаш за да бидам на врвот. Веројатно е поинаку за другите затоа што јас сум најдобар за нив и сега сум на мета на сите, но Новак е уште тука и сакам уште многу пати да играме еден против друг. Ако сакате да бидете најдобри, треба и да ги победувате најдобрите.
За потсетување, Шпанецот е третиот најмлад тенисер кој го освоил Вимблдон. Пред него тоа им успеало само на Бјорн Борг и Борис Бекер. Иако има 20 години и уште многу време за титули, сепак и Ѓоковиќ сè уште го нема кажано последниот збор и рече дека има намера да го освои 24. трофеј на „УС Опен“.
