ХБО објави официјален трејлер и главен вижуал за со „Еми“ наградената оригинална серија „Белиот лотос“ (The White Lotus). Третата сезона од осум епизоди ќе има премиера на 17 февруари.
Оваа општествена сатира е сместена во ексклузивното тајландско одморалиште и ги следи подвизите на најразлични гости и вработени во период од една недела.
Во главните улоги настапуваат: Лесли Биб, Кери Кун, Волтон Гогинс, Сара Кетрин Хук, Џејсон Ајзакс, Лалиса Манобал, Мишел Монаган, Сем Нивола, Лек Патравади, Паркер Поузи, Наташа Ротвел, Патрик Шварценегер, Тејм Таптимтонг и Ејми Лу Вуд. Во споредните улоги ќе ги гледаме: Николас Дуверне, Арнас Федеравичиус, Кристијан Фридел, Скот Глен, Дом Хетракул, Јулијан Костов, Шарлот Ле Бон, Моргана О’Рајли и Шалини Пејрис.
Креатор, сценарист и режисер на третата сезона е Мајк Вајт кој воедно е и извршен продуцент заедно со Дејвид Бернад и Марк Кемин.
Првата сезона, која имаше премиера во јули 2021 година и дејството беше сместено на Хаваите, доби 20 номинации за „Еми“ во 13 категории и освои 10 награди, најмногу освоени награди таа година вклучувајќи ја и наградата за најдобра минисерија или антологиска серија. Втората сезона која имаше премиера во декември 2022 година беше снимена на Сицилија и доби 23 номинации за „Еми“ и освои 5 награди меѓу кои и онаа за најдобра драмска серија.
