Фински научници открија загрижувачка врска меѓу здравјето на усната шуплина и срцевите удари, а новото истражување покажува дека бактериите од устата можеби имаат директна улога во создавањето опасни наслаги во артериите.
Студијата спроведена на Универзитет во Тампере анализирала артериски плаки кај повеќе од 200 пациенти со коронарна срцева болест, при што научниците откриле изненадувачки висок процент на орални бактерии во крвните садови. Резултатите биле објавени во научното списание Journal of the American Heart Association.
Истражувачите посочуваат дека станува збор за бактерии кои природно живеат во устата, но во одредени услови можат да навлезат во артериите и да придонесат за создавање и дестабилизација на атеросклеротските плаки – една од главните причини за срцев удар.
„Со години се сомневавме дека бактериите имаат улога во коронарните заболувања, но досега недостигаа директни и убедливи докази“, изјавил д-р Pekka Karhunen.
Научниците анализирале примероци од 121 пациент кој ненадејно починал, како и од уште 96 пациенти кои претходно биле оперирани поради затнати артерии. Кај повеќе од 42 проценти од случаите биле пронајдени орални стрептококи – бактерии кои најчесто се поврзуваат со усната шуплина.
Особено загрижува фактот што бактериите биле откриени длабоко во јадрото на плаките, на места каде што имунолошкиот систем речиси не може да ги открие.
Според истражувачите, стресот, инфекциите, лошата исхрана и хормоните на стрес може повторно да ги „активираат“ овие бактерии, предизвикувајќи воспаление и пукање на плаката – процес што директно може да доведе до срцев удар.
Научниците велат дека ова откритие дополнително ја потврдува сè посилната поврзаност меѓу здравјето на забите, непцата и кардиоваскуларниот систем.
Експертите предупредуваат дека редовната орална хигиена, стоматолошките контроли и грижата за непцата можеби се многу поважни за срцето отколку што досега се мислеше.
