Ед Ширан на својата фејсбук-страница премиерно ја објави стрип-анимацијата за својот последен хит Bad habits зад која во целост стојат македонските креативци од „351 студио“.
Стрип-анимацаијата е во стилот на стриповите од 60-тите и 70-тите години, видеото доби позитивни критики од фановите на музичарот. По официјалната премиера на „Фејсбук“, видеото е веќе достапно и на официјалниот јутјуб-канал на Ед Ширан, како и на другите платформи за видеосодржини.
„Продукцијата на видеото на Ед Ширан е само продолжување на успешната соработка, која ‘351 студио’ ја има со најголемите светски музички имиња, како Бруно Марс, Карди Би, Виз Калифа, Мигос, 21 Пилотс, Тиесто, Аријана Гранде, Зејн, Ники Минаж и најголемите светски издавачки куќи ‘Ворнер мјузик’, ‘Универзал мјузик’, ‘Сони мјузик’ и нивните лејблови Atlantic Records, Capitol Records, Def Jam, Columbia Records, Ultra, Spinnin Records, Armada Music. За шест години постоење, ‘351 студио’ изработи повеќе од 2.300 видеа зад кои стојат потписите на 30-ина млади креативци од нашата земја“, велат од „351 студио“.
Инаку, синглот Bad habits беше официјално објавен на 25 јуни, а повеќе од два месеца е број еден на британската топ-листа и на врвот на речиси сите топ-листи во светот.
