Механичарот Џулс Паркер (56) од Англија лани почнал да дизајнира секси долна облека за мажи. Тој за британскиот медиум „Лед бајбл“ раскажа како започнала неговата приказна.
„Мојата сопруга секогаш носи секси долна облека. Еднаш ја гледав и се восхитував на тоа украсно парче облека. И одеднаш ми дојде мислата ‘Па ова е лудо, зошто за мажите не постои такво нешто’. Жените имаат избор од 1000 парчиња долна облека, а ние во основа сме сведени само на боксерки“, вели Паркер.
Тогаш одлучил да започне свој бренд на секси долна облека за мажи, покрај неговата секојдневна работа која вклучува реставрација на стари автомобили. Но, неговата сопруга се вчудовидела од идејата.
„Отпрвин мислеше дека тоа е некаква средовечна криза. Подоцна мислеше дека цел живот сум ја криел сексуалноста од неа дека полека ќе се претворам во жена, но со текот на времето ја разбра суштината на мојата идеја и денес ми е голема поддршка“, тврди Џулс.
Иако често се среќава со коментари дека ги феминизира мажите на овој начин, тој сепак верува дека ситуацијата е обратна.
„Ајде да погледнеме во природа. Постојат видови птици кај кои женките имаат досадни пердуви, додека мажјаците се украсени со разни бои. Иста е ситуацијата и низ историјата. Ако се вратиме само сто години наназад, ќе видиме владетели и разни кралеви во раскошни комбинации, бидејќи тие значеа мажественост во тоа време“, тврди механичарот и додава: „Сакав да направам нешто што ќе ја слави машката фигура. Не сакам да носам женска облека или да станам жена. Апсолутно не ме интересира тоа, тоа не е поентата на овој бизнис. Само сакав да направам нешто убаво за мажите што ќе направи да се чувствуваат секси. Јас сум обичен тип. Механичар. Но сакам секси долна облека“, завршува Џулс.
