Американката Фатима Мадригал роди близнаци со разлика од 15 минути во Медицинскиот центар Навидад во Калифорнија, објави Дејли мејл.
„Ајлин Јоланда Трухило е првото бебе родено во 2022 година во Салинас. Нејзиниот брат близнак Алфредо Антонио Трухило е роден 15 минути порано, во 23:45 часот на 31 декември. Тоа значи дека нивните родендени паѓаат во различни денови, месеци и години – шансите за ова се 1 на 2 милиони“, се вели на Твитер профилот на болницата.
„Лудо е што се близнаци и имаат различни родендени. Изненадена сум и среќна“, изјави мајката за магазинот Пипл.
И докторката Ана Абрил Аријас е изненадена и вели дека ова е еден од најнезаборавните моменти во нејзината кариера.
Не е првпат да се случи ваков нешто. Пред две години се случи слична ситуација, кога жена од Индијана го роди своето прво дете на 31 декември 2019 година, додека второто на 1 јануари 2020 година. Близнаците се родија со разлика од 30 минути.
Секоја година во САД се раѓаат околу 120.000 близнаци, што претставува околу три отсто од вкупниот број на породувања, меѓутоа е исклучително ретко да се родат близнаци со различни родендени.
