Згодниот скротител на змии пронајден мртов во својата спална соба

Британецот Брандон бил опседнат со егзотични животни. Искусниот експерт за змии е пронајден мртов во својата спална соба, само неколку метри од својот миленик питон, кој побегнал од кафезот.Љубителот на животни и скротител на змии, Дан Брандон (31), претрпел сериозни повреди од кои починал во својот дом во англискиот Хампшир, каде што живеел со своите родители и многубројни егзотични миленици, пишува „Дејли мејл“.

Неговиот профил на „Фејсбук“ е исполнет со фотографии од него и питонот, а пријателите му коментирале дека „не е нормален“. На една фотографија е обвиен со албино-питон, чија просечна должина е 5,5 метри, а тежок 71 килограм.

„Беше опседнат со дивите животни, змии, пајаци и птици“, велат неговите пријатели.

Полицијата ја потврдила неговата смрт, а истрагата упатува на тоа дека бил усмртен токму од питонот.

Истрагата и понатаму е во тек, а допрва треба да се истражи дали змијата била причинител на смртта.

Истражителите ги чекаат целосните токсиколошки резултати од обдукцијата. Од тие резултати ќе зависи дали ќе се отвори истрага.

И покрај тоа што била забележана во близина на телото на стопанот, пријателите на починатиот сметаат дека змијата нема врска со неговата смрт.

Како и да е, познато е дека питоните може да бидат смртоносни. Така, претходно оваа година еден човек беше усмртен во Индонезија, а две момчиња беа убиени во Канада кога еден питон побегнал од продавницата за домашни миленици.

Инаку, питоните убиваат само за храна, а се верува дека ова е прв таков случај во Велика Британија, пишува „Мирор“.

Scroll to Top