Слатката султанова сарма, или паша локум, со својата ориентално рафинирана нота од кокос и чоколадо, го освежува слаткото мени на секое домаќинство.
Состојките се едноставни, поради што вистинската магија се случува во процесот на правење, во кој воопшто нема печење.
Состојки:
- 300гр шеќер
- 1л млеко
- 100гр путер
- 60гр густин
- 120гр брашно
- 30гр какао
- 1 ќесичка ванилин шеќер
- 100гр кокос
- 150-200мл слатка павлака
Подготовка:
Се мешаат шеќерот, брашното, какаото и густинот и се додава 200 мл млеко. Остатокот од млекото се става да зоврие. Претходно направената смеса се додава во зовриеното млеко и се меша на тивок оган, додека содржината не се згусне како пудинг.
Смесата се трга од оган и во неа се додава путерот. Сето тоа се мати со миксер додека се не се стопи и соедини целосно.
Квадратна стандардна тава за печење се обложува со хартија за печење, а потоа рамномерно се распоредува кокосот по дното на плехот.
Претходно приготвената смеса се истура во плехот, додека е сè уште жешка, се распределува по аглите и се остава да се излади.
Се прави шлаг од слатката павлака и рамномерно се става преку оладената смеса.
Се сече на ленти широки околу 5 см, и секоја од нив уште на пола. Секоја лента се витка внимателно со лесен притисок, за слатките сарми да не се сплеснати.
