По две години хибридно издание на меѓународниот филмски фестивал „Киненова“, седмото издание се враќа со филмски премиери во киносалите.
Хрватскиот актер Горан Богдан ќе биде гостин на отворањето на „Киненова“ и двајцата млади режисери што се потпишуваат на филмот „Чичко“ со кој почнува официјалната програма на фестивалот.
Главната селекција на фестивалот содржи осум филма. Отворањето ќе биде на 7 октомври во киното „Милениум“, со хрватскиот филм „Чичко“ на двајцата млади режисери Давид Капац и Андрија Мардешиќ.
„Другите седум филма се од разни кинематографии од Србија, Косово, Романија, Полска и еден документарен филм од Италија. На фестивалот ќе има споредни програми со кои се задржува сензибилитетот на фестивалот. Филм на Австриецот Михаел Ханеке и ‘Режисерот во фокус’, чии први три филма го трасираа неговиот пат до европскиот и светскиот врв, потоа изборот на филмови од актуелната португалска и ирска кинематографија, како и соработката со полскиот фестивал ‘Вистула’“, изјави за „Репортер“ селекторот на фестивалот, Игор Анѓелков.
„Киненова“ изминатите години беше домаќин и на многубројни актерски имиња, како Мира Фурлан, која беше гостинка на првото издание на фестивалот. Меѓу другите, беа и Бранка Катиќ, Жарко Лаушевиќ, како и српскиот режисер Горан Марковиќ. Покрај актерот Горан Богдан, оваа година гостинка ќе биде и унгарската режисерка Илдико Енједи.
„Добитникот на највисоката награда на фестивалот за особен придонес во филмската уметност е најзначајната и голема унгарска режисерка во моментот – Илдико Енједи. Таа ќе има свој мастер-клас во Кинотеката на Македонија, тоа е стручен мастер-клас, пред сѐ, за филмските професионалци и автори, но ќе биде отворен за широката јавност“, рече директорот на МФФ „Киненова“, Небојша Јовановиќ.
Илдико ќе сподели филмски искуства за снимањето на победникот на Берлиналето во 2017 година, филмот „За душата и телото“, финалист и за „Оскар“.
За филмски имиња да бидат гости на фестивалот, потребен е голем ангажман, но и желба да бидат гости.
„Имаат голема желба да дојдат, но кога станува збор за големи професионалци, барани и славни, тоа може тешко да се усогласи со нивната агенда. Тоа е голем работа да се натокмат датумите и периодот, и тоа се месеци и месеци преговарање. Потребни се многу трпение, љубов и ентузијазам, ние со доста мали симболични ресурси го правиме фестивалот“, рече директорот на „Киненова“.
Филмскиот фестивал почнува од 7 до 14 октомври, некои од проекциите ќе се одржат во Кинотеката, други во киното „Милениум“, а билетите ќе бидат по цена од 100 денари.
Габриела Додевска