Австриската забрана за носење бурки на јавни места стапи во сила уште од минатата недела.
Владата соопшти дека тој нов закон ќе помогне во потврдувањето на австриските вредности и унапредување на интеграцијата и покрај фактот дека во јавноста ретко може да се видат такви покривки за глава.
На жените засега им е забрането да го покриваат своето лице во јавност со носење бурки, кои го покриваат целото лице, и никаб, каде што остануваат непокриени само очите.
Кршењето на законот ќе се казнува со парична казна во износ од 150 евра.
Ова ново правило е дел од интеграцискиот пакет на политика што го иницира конзервативниот министер за надворешни работи и интеграција, Себастијан Курц, во обид да победи на парламентарните избори на 15 октомври.
Народната партија на Курц води на анкетите и 31-годишниот политичар би можел да стане премиер. Неговата изборна кампања е силно фокусирана на ограничување на имиграцијата и растечката исламизација.
Во 2011 година Франција стана прва европска земја која забрани покривање на лицето во јавност. Нејзиниот пример го следеа Белгија, Бугарија и регионот во Швајцарија, Тицино, а Холандија забрани покривање на лицето во јавни згради.
Во април годинава германскиот парламент се одлучи за ограничена забрана која се однесува само за државните и воените службенички.
Европскиот суд за човекови права потврди во јули дека таквите забрани се илегални и го поддржуваат гледиштето дека луѓето треба да си ги гледаат лицата едни на други за да изградат нормални односи и да живеат во демократско општество.
