Најстариот паб во Англија, Ye Olde Fighting Cocks, е затворен по 1.229 години постоење откако компанијата што ја поседува неговата лиценца за работа отиде во стечај.
Кристо Тофали, кој раководи со пабот, жали што мора да го затвори Ye Olde Fighting Cocks, кој постои од 793 година. Тој за британските медиуми вели дека се соочиле со големи проблеми поради короната и дека веќе не може да го држат отворен пабот, кој последниве години и онака работел со загуба.
Тофали се надева дека некој ќе го купи најстариот англиски паб и дека повторно ќе го отвори.
„Сите ние го бараме најдобриот пат напред, а јас се надевам дека пабот повторно ќе се отвори со нови сопственици и дека тие ќе задржат малку од душата и духот на она што постои над илјада години“, вели тој за Би-би-си.
Ye Olde Fighting Cocks е најстариот паб во Англија, според Гинисовата книга на рекордите, иако постојат и такви што го оспоруваат тврдењето и велат дека во земјата има уште постари пабови.
Иако пабот преживеал војни, чуми и економски кризи, според Тофали, кој раководел со него една деценија, короната била погубна.
„Изминативе две години без преседан беа најлоши за угостителската индустрија и нè победија сите нас шот се трудевме максимално да му помогнеме на овој паб да продолжи да работи и во иднина. Срцето ми е скршено, овој паб ми беше многу повеќе од бизнис и се чувствувам почестен што имав макар и мала улога во неговата историја“, рекол Тофали.
Тој додал и дека добил многу пораки со поддршка и од градот и од целиот свет откако на „Фејсбук“ објавил дека пабот ќе биде затворен.
„Никогаш не сум видел нешто слично. Сите пораки што ги добив сами по себе говорат што постигнавме. Да се чита за влијанието што го имавме врз луѓето е зачудувачки и крајно понизно. Станавме важен дел од заедницата, а семејството што го создадовме беше огромно“, рекол тој.
