Од 1994 година до денес се изгубени 28 трилиони тони мраз, тврдат британските научници кои користеле сателити за да ја истражат површината на Земјата. Ова количество загубен мраз научниците од универзитетите во Лидс, Единбург и Лондон го опишаа како „зачудувачко“, пишува „Гардијан“.
„Ако глечерите и ледените плочи продолжат да се топат со ова темпо, секој сантиметар раст на нивото на морето ќе значи дека околу еден милион луѓе ќе бидат раселени од нивните домови“, вели професорот Енди Сефард од Универзитетот во Лидс.
Научниците посочуваат дека топењето на мразот во овие количества сериозно ја намалува можноста Земјата да го одбие сончевото зрачење назад во вселената. Мразот исчезнува, а морето или земјата под него апсорбираат сè повеќе топлина, со што се зголемува затоплувањето на планетата.
„Истражувачите во минатото проучувале само одредени области, како што се Антарктикот или Гренланд, гледајќи каде и колку се топи мразот. Ова е прв пат некој да ја проучи целата површина на земјата. Она што го најдовме нè остави без зборови”, додал Сефард.
